1 Եւ այն օրը Դեբօրան եւ Աբինոամի որդի Բարակը երգեցին եւ ասեցին,
2 Իսրայէլի զօրավարներն առաջնորդելով, Ժողովուրդը յօժարակամ լինելով, Օրհնեցէք Տիրոջը։
3 Լսեցէք, թագաւորներ, Ականջ դրէք, նախարարներ. Ես երգում եմ Տիրոջը. Սաղմոս եմ ասում Իսրայէլի Տէր Աստուծուն։
4 Ով Տէր, դու Սէիրիցը դուրս գալիս, Դու Եդովմի դաշտից չուելիս, Երկիրը շարժեց, երկինքը տեղաց, Եւ ամպերը ջուր տեղացին։
5 Սարերը հալուեցան Տիրոջ երեսիցը՝ Այս Սինան՝ Իսրայէլի Տէր Աստուծոյ երեսիցը։
6 Անաթի որդի Սամեգարի օրերումը, Յայէլի օրերումը՝ Ուղիները դադարել էին, Եւ ճանապարհորդները խոտորնակ ուղիներով էին գնում։
7 Իսրայէլի մէջ զօրավարներ չմնացին, չմնացին. Մինչեւ որ վեր կացայ ես՝ Դեբօրա, Մինչեւ որ վեր կացայ ես՝ մայրս Իսրայէլի մէջ։
8 Ընտրեցին նոր աստուածներ. Իսկոյն պատերազմ եղաւ դռներումը. Արդե՞օք վահան կամ նիզակ երեւեցաւ Իսրայէլի քառասուն հազարի մէջ։
9 Իմ սիրտը դէպի Իսրայէլի իշխաններն է. Ով ժողովրդի անձնուէրներ, Օրհնեցէք Տիրոջը։
10 Սպիտակ էշերի վերայ հեծնողներ, Գորգի վերայ՝՝ նստողներ, Եւ ճանապարհի վերայ գնացողներ, երգեցէք։
11 Աղեղնաւորների ձայնից ազատուած Ջուր հանելու տեղերի մէջ, Այն տեղ գովաբանում են Տիրոջ արդարութիւնները Նորա զօրավարների արդարութիւնները՝ Իսրայէլի մէջ, Երբոր Տիրոջ ժողովուրդը դռներն իջան։
12 Արթնացիր, արթնացիր, Դեբօրա, Արթնացիր, արթնացիր, երգ ասիր, Վեր կաց, Բարակ, Գերութիւնդ գերի արա, ով Աբինոամի որդի։
13 Այն ժամանակ փախստականներն իջան Ժողովրդի հզօրների մօտ. Տէրն ինձ հետ իջաւ Զօրաւորների հետ։
14 Եփրեմից եկան նորանք, որոնց արմատը Ամաղէկումն է. Քո ետեւիցը, Բենիամին, քո ժողովրդի մէջ Մաքիրից իջան իշխաններ, Եւ Զաբուղոնից՝ դպրի գրիչ բռնողներ։
15 Եւ Իսաքարի իշխանները Դեբօրայի հետ, Եւ Իսաքարը Բարակի պէս Հովիտը ուղարկուեցաւ նորա ետեւիցը. Ռուբէնի հեղեղատների մէջ Մեծ յուզմունք կար։
16 Ի՞նչու համար փարախների մէջ նստեցիր, Որ հօտերի մայելը լսես։ Ռուբէնի հեղեղատներումը Մեծ տարակուսանք կար։
17 Գաղաադը Յորդանանի այն կողմին էր բնակվում, Եւ Դանը ի՞նչու համար նաւերումը պանդուխտ մնաց։ Ասերը ծովի եզերքումն է նստում, Եւ իր նաւահանգիստների մօտ է բնակվում։
18 Զաբուղոնը մի այնպիսի ժողովուրդ է, Որ իր կեանքն արհամարհում է մինչեւ մահ, Եւ Նեփթաղիմը դաշտի բարձր տեղերումը՝ զինքը։
19 Թագաւորները եկան, պատերազմեցին. Այն ժամանակ պատերազմեցին Քանանացիների թագաւորները Թանաքի մէջ Մակեդդովի ջրի մօտ. Փողի աւար չառան։
20 Երկնքիցը պատերազմեցին. Աստղերն իրանց շրջաններիցը Սիսարայի դէմ պատերազմեցին։
21 Կիսոն հեղեղատը քշեց նորանց՝ Այն հին հեղեղատը՝ Կիսոնի հեղեղատը։ Ով իմ անձն, զօրութիւնը կոխիր։
22 Այն ժամանակ ձիերի սմբակները կոտրատուեցան վազելուցը՝ Նորա զօրաւորների վազելուցը։
23 Անիծեցէք Մարովզը, ասեց Տիրոջ հրեշտակը, Նորա բնակիչներին սաստիկ անիծեցէք, Որովհետեւ Տիրոջ օգնութեանը չեկան, Տիրոջ օգնութեանը՝ զօրաւորների դէմ։
24 Օրհնեալ լինի կանանց մէջ Յայէլը՝ Կենեցի Քաբերի կինը, Վրանների մէջ կանայքներից օրհնեալ լինի։
25 Ջուր ուզեց. Կաթ տուաւ, Իշխանաց ամանովը կոգի մատուցրեց։
26 Իր ձեռքը ցիցին մեկնեց, Եւ իր աջ ձեռքը՝ հիւսան ուռին, Եւ Սիսարային զարկեց գլուխը ճեղքեց, Եւ ջարդեց մխեց նորա ծամելիքը։
27 նա կորացաւ, յայէլի ոտքերի մէջ ընկաւ փռուեցաւ, Նորա ոտքերի մէջ կարացաւ ընկաւ. Ուր որ կորացաւ՝ այնտեղ ընկաւ խոցուած։
28 Պատուհանիցը նայում եւ աղաղակում է Սիսարայի մայրը վանդակի ետեւից. Ի՞նչու համար է ուշանում նորա կառքը գալու, Ի՞նչու են ետանում նորա կառքերի քայլերը։
29 Նորա իմաստուն տիկինները պատասխանում են նորան, Հէնց ինքն էլ իր խօսքերի պատասխանը տալիս է իրան.
30 Անշուշտ նորանք աւար են գտել, բաժանում են, Մէկ կամ երկու աղջիկ՝ իւրաքանչիւր հզօրի համար, Իսկ Սիսարայի համար՝ գոյնզգոյն աւար, Գոյնզգոյն նկարագործ աւար, Երկու կողմից հիւսկէն եւ պարանոցի համար գոյնզգոյն աւար։
31 Այսպէս կորչեն քո բոլոր թշնամիները, ով Տէր, Իսկ նորան սիրողները լինեն ինչպէս իր զօրութեամբը ծագող արեւը։ Եւ երկիրը հանգստացաւ քառասուն տարի։ |
