1 ወኀለየት ፡ ዴቦራ ፡ ወባረቅ ፡ በይእቲ ፡ ዕለት ፡ ወትቤ ፡ እንዘ ፡ ተኀሊ ።
2 ሶበ ፡ አኀዙ ፡ መሳፍንተ ፡ እስራኤል ፡ በሕሊና ፡ ሕዝብ ፡ ይባርክዎ ፡ ለእግዚአብሔር ።
3 ስምዑ ፡ ነገሥት ፡ ወአጽምዑ ፡ መኳንንተ ፡ ጽኑዓን ፡ አንሰ ፡ አኀሊ ፡ ለእግዚአብሔር ፡ [አምላከ ፡] እስራኤል ።
4 እግዚኦ ፡ በፀአትከ ፡ እምነ ፡ ሴይር ፡ ሶበ ፡ ተንሣእከ ፡ እምነ ፡ ሐቅለ ፡ ኤዶም ፡ ምድር ፡ አድለቅለቀት ፡ ወሰማይ ፡ ደንገፀት ፡ ወደመናትኒ ፡ አንጠብጠ[ቡ] ፡ ማ[የ] ።
5 ወአድባር ፡ ተከውሱ ፡ እምነ ፡ ቅድመ ፡ እግዚአብሔር ፡ ዝንቱ ፡ ሲና ፡ እምቅድመ ፡ እግዚአብሔር ፡ አምላከ ፡ እስራኤል ።
6 በመዋዕለ ፡ ሴሜጌር ፡ ወልደ ፡ ቄነት ፡ ወበመዋዕለ ፡ ኢያኤል ፡ ኀልቁ ፡ ነገሥት ፡ ወሖሩ ፡ ፍናዌ ፡ መብእሰ ፡ ፍናዌ ፡ ግፍቱኣተ ።
7 ወኀልቁ ፡ መፈክራን ፡ እምነ ፡ እስራኤል ፡ ወኀልቁ ፡ [እስከ ፡] ተንሥአት ፡ ዴቦራ ፡ እስ[ከ] ፡ ቆመት ፡ እም ፡ ለእስራኤል ።
8 ወሠምሩ ፡ በአማልክተ ፡ ከንቱ ፡ ከመ ፡ ኅብስተ ፡ ስገም ፡ ሶበ ፡ ይከድንዎ ፡ ውዕዩ ፡ አርማሕ ፡ አርባዕቱ ፡ እልፍ ፡ አርማሕ ።
9 ልብየሰ ፡ ውስተ ፡ ዘትእዛዞ ፡ ለእስራኤል ፡ ኀያላኒሆሙ ፡ ለእስራኤል ፡ ባርክዎ ፡ ለእግዚአብሔር ።
10 እለ ፡ ትጼዐኑ ፡ ላዕለ ፡ አእዱግ ፡ [ፅዕድዋን ፡] ወትነብሩ ፡ በውስተ ፡ ብርሃን ፡ ንብቡ ፡ ቃለክሙ ።
11 ወሰንቅው ፡ ማእከለ ፡ ፍሡሓን ፡ ወበህየ ፡ ይሁቡ ፡ ጽድቀ ፡ ለእግዚአብሔር ፡ ወጽድቀ ፡ [አጽ]ንዐ ፡ በውስተ ፡ እስራኤል ፡ ወይእተ ፡ አሚረ ፡ ወረደ ፡ ውስተ ፡ አህጉሪሁ ፡ ሕዝበ ፡ እግዚአብሔር ።
12 ተንሥኢ ፡ ዴቦራ ፡ ወአንሥኢ ፡ አእላፈ ፡ ምስለ ፡ ሕዝብ ፡ ተንሥኢ ፡ ተንሥኢ ፡ ምስለ ፡ ማኅሌት ፡ ወበኀይል ፡ ተንሥእ ፡ ባረቅ ፡ ወጸንዒዮ ፡ ዴቦራ ፡ ለባረቅ ፡ ወፄውው ፡ ፄዋከ ፡ ባረቅ ፡ ወልደ ፡ አቢኔሔም ፡ ከመ ፡ አመ ፡ ዐብየ ፡ ኀይሉ ።
13 እግዚኦ ፡ አድክሞሙ ፡ ሊተ ፡ ለእለ ፡ ይጸንዑኒ ።
14 ሕዝበ ፡ ኤፍሬም ፡ (ወ)ቀሰፎሙ ፡ በውስተ ፡ ቈላት ፤ እኁከ ፡ ብንያሚ ፡ በሕዝብከ ፤ እምኔየ ፡ ማኪር ፡ ወረዱ ፡ ይፍትኑ ፡ ወእምነ ፡ ዛቡሎን ፡ እግዚአብሔር ፡ ይፀብእ ፡ ሊተ ፡ ወእምነ ፡ ኀያላን ፡ እምህየ ፡ [በበ]ትረ ፡ ኀይለ ፡ ነገር ።
15 ወእምውስተ ፡ ይሳኮር ፡ ምስለ ፡ ዴቦራ ፡ ፈነወ ፡ አጋርያኒሁ ፡ ውስተ ፡ ቈላት ፡ ከመ ፡ ትንበር ፡ አንተ ፡ ማእከለ ፡ ከናፍር ፡ ወሰፍሐ ፡ በእገሪሁ ፡ ናፍቆ ፡ ሮቤል ፤ ዐቢይ ፡ ጥይቅና ፡ ልቡ ።
16 ለምንት ፡ ሊተ ፡ ትነብር ፡ ማእከለ ፡ ሞሶጴተም ፡ ከመ ፡ ታጽምእ ፡ ከመ ፡ ይትፋጸዩ ፡ እለ ፡ ይትነሥኡ ፡ ከመ ፡ ይኅልፉ ፡ ውስተ ፡ ዘሮቤል ።
17 ዐቢይ ፡ አሰረ ፡ ልቡ ፡ ለገላአድ ፡ ውስተ ፡ ማዕዶተ ፡ ዮርዳንስ ፡ ኀደረ ፤ ወዳን ፡ ለምንት ፡ ይነብር ፡ ውስተ ፡ አሕማር ፤ ወአሴርሰ ፡ ነበረ ፡ ውስተ ፡ ሐይቀ ፡ ባሕር ፡ ወውስተ ፡ ወሰኑ ፡ ነበረ ።
18 ዛቡሎን ፡ ሕዝብ ፡ ዘዐየረ ፡ ነፍሶ ፡ ለሞት ፡ ወንፍታሌም ፡ ውስተ ፡ መልዕልተ ፡ ሐቅል ።
19 ወመጽኡ ፡ ነገሥት ፡ ወተቃተሉ ፡ ወይእተ ፡ አሚረ ፡ ተቃተሉ ፡ ነገሥተ ፡ ከናአን ፡ በተናኅ ፡ በኀበ ፡ ማየ ፡ መጌዶ ፡ ወኢነሥ[ኡ] ፡ በትእግልት ፡ ብሩረ ።
20 ወበሰማይ ፡ ተፃብኡ ፡ ከዋክብት ፡ እምነ ፡ ቀትሎሙ ፡ ወተቃተሉ ፡ ምስለ ፡ ሲሳራ ።
21 ወአውፅኦሙ ፡ ፈለገ ፡ ቂሶን ፡ ወፈለገ ፡ ቀዴሚን ፡ ወቀተሎ ፡ ፈለገ ፡ ቂሶን ፤ ነፍስየ ፡ ጽንዒ ።
22 ወይእተ ፡ አሚረ ፡ ተቀጥቀጠ ፡ ሰኰና ፡ አፍራሲሆሙ ፡ ለአማዳሮት ።
23 ወኀያላኒሁ ፡ ይረግም[ዋ] ፡ ለማዞር ፡ ወይቤ ፡ መልአከ ፡ እግዚአብሔር ፡ በመርገም ፡ ርግምዎሙ ፡ ለእለ ፡ ውስተ ፡ አብያቲሃ ፡ እስመ ፡ ኢመጽኡ ፡ ውስተ ፡ ረድኤተ ፡ እግዚአብሔር ፡ እምነ ፡ መስተቃትላን ፡ ጽኑዓን ።
24 ቡርክተ ፡ ትኩን ፡ እምነ ፡ አንስት ፡ ኢያኤል ፡ ብእሲተ ፡ [ካቤር ፡] ቄንያዊ ፡ እምነ ፡ አንስት ፡ ቡርክት ፡ በውስተ ፡ ደብተራ ።
25 ማየ ፡ ሰአለ ፡ ወሐሊበ ፡ ወሀበቶ ፡ ወበዐይገን ፡ ዐቢይ ፡ አቅረበት ፡ ሎቱ ፡ ዕቋነ ።
26 ወበእዴሃ ፡ እንተ ፡ ፀጋም ፡ ተመጠወት ፡ መትከለ ፡ ወበየማና ፡ ጐድአት ፡ ወቀተለቶ ፡ ለሲሳፌ ፡ ወቀጥቀጠቶ ፡ ርእሶ ፡ ወደመቀቶ ፡ መልታሕቶ ።
27 ወተራገፀ ፡ በማእከለ ፡ እገሪሃ ፡ ወበኀበ ፡ ተራገፀ ፡ በህየ ፡ ኀስረ ።
28 ወእንተ ፡ መስኮት ፡ ትኄውጽ ፡ እሙ ፡ ለሲሳራ ፡ እንተ ፡ ሠቅሠቅ ፡ ትሬኢ ፡ እመቦ ፡ ዘገብአ ፡ እምኀበ ፡ ሲሳራ ፡ ወበበይነ ፡ ምንት ፡ ተደኀረ ፡ ሰረገላሁ ፡ ለሲሳራ ፡ በጺሐ ፡ ወበበይነ ፡ ምንት ፡ ጐንደያ ፡ እግረ ፡ ሰረገላቲሁ ።
29 ጠቢባተ ፡ መልአካ ፡ ላቲ ፡ (ወ)አውሥኣሃ ፡ ወእማንቱሴ ፡ አውሥኣሃ ፡ በከመ ፡ ቃላ ።
30 አኮኑ ፡ ረከባሁ ፡ እንዘ ፡ ይከፍል ፡ ምህርካ ፡ ወይትዓረክ ፡ አዕርክቱ ፡ በላዕለ ፡ አርእስቲሆሙ ፡ ለኀያላን ፡ በርበረ ፡ ሕብር ፡ ውእቱ ፡ ሲሳራ ፡ በርበረ ፡ ሕብር ፡ ወዘዘዚአሁ ፡ ጥምዐተ ፡ ሕበሪሁ ፡ ወዐሥቅ ፡ ውስተ ፡ ክሣዱ ፡ ዘበርበረ ።
31 ከማሁ ፡ ለይትሐጐሉ ፡ ኵሎሙ ፡ ፀርከ ፡ እግዚኦ ፡ ወእለሰ ፡ ያፈቅሩከ ፡ ከመ ፡ ሠርቀ ፡ ፀሓይ ፡ በኀይሉ ። ወአዕረፈት ፡ ምድር ፡ ፵ዓመ ። |
