1 И҆ речѐ гд҇ь къ мѡѷсе́ю, гл҃ѧ:
2 заповѣ́ждь сынѡ́мъ ї҆и҃лєвымъ, и҆ рече́ши къ ни҄мъ: вы̀ вхо́дите въ зе́млю ханаа́ню, сїѧ̀ бѹ́детъ ва́мъ въ наслѣ́дїе, землѧ̀ ханаа́нѧ съ предѣ҄лы є҆ѧ̀:
3 и҆ бѹ́детъ ва́мъ страна̀, ѩ҆́же къ лі́вѣ ѿ пѹсты́ни сі́нъ да́же до є҆дѡ́ма: и҆ бѹ́дѹтъ ва́мъ предѣ́лѣ къ лі́вѣ, ѿ кра́ѧ мо́рѧ сла́нагѡ ѿ восто́кѡвъ,
4 и҆ ѡ҆б̾и́дѹтъ ва́съ предѣ́лы ѿ лі́вы до возше́ствїѧ а҆краві́нѧ, и҆ про́йдѹтъ є҆нна́къ, и҆ бѹ́детъ и҆схо́дъ є҆гѡ̀ къ лі́вѣ ка́дисъ-варнѝ, и҆ и҆зы́детъ на село̀ а҆ра́дъ, и҆ про́йдетъ а҆селмѡ́на:
5 и҆ ѡ҆б̾и́дѹтъ предѣ́лы ѿ а҆селмѡ́на водоте́чѹ є҆гѵ́петскѹю, и҆ бѹ́детъ и҆схо́дъ мо́ре (вели́кое):
6 и҆ предѣ́лы морсті́и бѹ́дѹтъ ва́мъ, мо́ре вели́кое ѡ҆предѣли́тъ, сїѐ бѹ́детъ ва́мъ предѣ́лы морсті́и:
7 и҆ сїѐ бѹ́детъ ва́мъ предѣ́лъ къ сѣ́верѹ: ѿ мо́рѧ вели́кагѡ и҆змѣ́рите са́ми себѣ̀ при горѣ̀ [го́рѹ]:
8 и҆ ѿ горы̀ [го́рѹ] и҆змѣ́рите са́ми себѣ̀, входѧ́ще во є҆ма́ѳъ, и҆ бѹ́дѹтъ прехо́дъ є҆гѡ̀ предѣ́лы садада̀:
9 и҆ и҆зы́дѹтъ предѣ́лы зефрѡ́на, и҆ бѹ́детъ и҆схо́дъ є҆гѡ̀ а҆рсенаі́нъ: сїѐ бѹ́детъ ва́мъ предѣ́лы ѿ сѣ́вера:
10 и҆ и҆змѣ́рите са́ми себѣ̀ предѣ́лы востѡ́чныѧ ѿ а҆рсенаі́на до сепфама́ра:
11 и҆ сни́дѹтъ предѣ́лы ѿ сепфама́ръ-вила̀ ѿ востѡ́къ на и҆сто́чники, и҆ сни́дѹтъ предѣ́лы вилы̀, и҆ про́йдѹтъ на хребе́тъ мо́рѧ хенере́ѳъ, ѿ востѡ́къ:
12 и҆ сни́дѹтъ предѣ́лы на ї҆ѻрда́нъ, и҆ бѹ́детъ прехо́дъ є҆гѡ̀ мо́ре сла́ное: сїѧ̀ бѹ́детъ землѧ̀ ва́мъ, и҆ предѣ́лы є҆ѧ̀ ѡ҆́крестъ.
13 И҆ заповѣ́да мѡѷсе́й сынѡ́мъ ї҆и҃лєвымъ, глаго́лѧ: сїѧ̀ землѧ̀, ю҆́же прїи́мете въ наслѣ́дїе по жре́бїю, ѩ҆́коже повелѣ̀ гд҇ь, да́ти ю҆̀ девѧтѝ племенѡ́мъ и҆ полѹпле́мени манассі́инѹ:
14 ѩ҆́кѡ взѧ̀ пле́мѧ сынѡ́въ рѹви́млихъ и҆ пле́мѧ сынѡ́въ га́довыхъ, по домѡ́мъ ѻ҆те́чествъ и҆́хъ, и҆ по́лъ пле́мене манассі́ина воспрїѧ́ша жрє́бїѧ своѧ҄:
15 два̀ племена̀ и҆ по́лъ пле́мене прїѧ́ша жрє́бїѧ своѧ҄ за ї҆ѻрда́номъ при ї҆ерїхѡ́нѣ ѿ полѹ́днѧ на восто́ки.
16 И҆ речѐ гд҇ь къ мѡѷсе́ю, гл҃ѧ:
17 сїѧ҄ и҆мена̀ мѹже́й, и҆̀же раздѣлѧ́тъ ва́мъ зе́млю: є҆леаза́ръ жре́цъ и҆ ї҆исѹ́съ наѵи́нъ:
18 и҆ по кнѧ́зю є҆ди́номѹ ѿ пле́мене во́змете раздѣли́ти ва́мъ зе́млю.
19 И҆ сїѧ҄ и҆мена̀ мѹжє́мъ: пле́мене ї҆ѹ́дина хале́въ сы́нъ ї҆ефонні́инъ,
20 пле́мене сѷмеѡ́нѧ саламїи́лъ сы́нъ семїѹ́довъ,
21 пле́мене венїамі́нѧ є҆лда́дъ сы́нъ хаслѡ́нь,
22 пле́мене да́нова кнѧ́зь воккѡ́ръ сы́нъ ї҆еклі́нинъ,
23 сынѡ́въ ї҆ѡ́сифовыхъ пле́мене сынѡ́въ манассі́иныхъ кнѧ́зь а҆нїи́лъ сы́нъ сѹфі́довъ,
24 пле́мене сынѡ́въ є҆фре́млихъ кнѧ́зь камѹи́лъ сы́нъ сафта́новъ,
25 пле́мене завѹлѡ́нѧ кнѧ́зь є҆лїсафа́нъ сы́нъ харна́ховъ,
26 пле́мене сынѡ́въ ї҆ссаха́ровыхъ кнѧ́зь фалтїи́лъ сы́нъ ѻ҆за́инъ,
27 пле́мене сынѡ́въ а҆си́ровыхъ кнѧ́зь а҆хїѡ́ръ сы́нъ селемі́инъ,
28 пле́мене нефѳалі́млѧ кнѧ́зь фадаи́лъ сы́нъ а҆мїѹ́довъ.
29 Си҄мъ заповѣ́да гд҇ь раздѣли́ти сынѡ́мъ ї҆и҃лєвымъ въ землѝ ханаа́ни. |
