1 И҆ мѡѷсе́ю речѐ: взы́ди ко гд҇ѹ ты̀ и҆ а҆арѡ́нъ, и҆ нада́въ и҆ а҆вїѹ́дъ и҆ се́дмьдесѧтъ ста́рєцъ ї҆и҃левыхъ, и҆ да покло́нѧтсѧ и҆здале́че гд҇ѹ:
2 и҆ да пристѹ́питъ мѡѷсе́й є҆ди́нъ къ бг҃ѹ, ѻ҆ни́ же да не пристѹ́пѧтъ: и҆ лю́дїе съ ни́ми да не взы́дѹтъ.
3 Прїи́де же мѡѷсе́й и҆ повѣ́да лю́демъ всѧ҄ словеса̀ бж҃їѧ и҆ ѡ҆правда҄нїѧ. Ѿвѣща́ша же всѝ лю́дїе гла́сомъ є҆ди́нымъ, глаго́люще: всѧ҄ словеса̀, ѩ҆̀же гл҃а гд҇ь, сотвори́мъ и҆ послѹ́шаемъ.
4 И҆ написа̀ мѡѷсе́й всѧ҄ словеса̀ гд҇нѧ: ѡ҆бѹ́трѣвъ же мѡѷсе́й заѹ́тра, созда̀ ѻ҆лта́рь под̾ горо́ю, и҆ двана́десѧть ка́менїй въ двана́десѧть племе́нъ ї҆и҃левыхъ:
5 и҆ посла̀ ю҆́ношы сынѡ́въ ї҆и҃левыхъ, и҆ принесо́ша всесожжє́нїѧ, и҆ пожро́ша же́ртвѹ сп҇нїѧ гд҇ѹ бг҃ѹ телцы̀.
6 Взе́мъ же мѡѷсе́й полови́нѹ кро́ве, влїѧ̀ въ ча́шы, полови́нѹ же кро́ве возлїѧ̀ на ѻ҆лта́рь,
7 и҆ взе́мъ кни́гѹ завѣ́та, прочтѐ лю́демъ во ѹ҆́шы. И҆ реко́ша: всѧ҄, є҆ли҄ка гл҃а гд҇ь, сотвори́мъ и҆ послѹ́шаемъ.
8 Взе́мъ же мѡѷсе́й кро́вь, ѡ҆кропѝ лю́ди и҆ речѐ: сѐ, кро́вь завѣ́та, є҆го́же завѣща̀ гд҇ь къ ва́мъ ѡ҆ всѣ́хъ словесѣ́хъ си́хъ.
9 И҆ взы́де мѡѷсе́й и҆ а҆арѡ́нъ, и҆ нада́въ и҆ а҆вїѹ́дъ и҆ се́дмьдесѧтъ ѿ ста́рєцъ ї҆и҃левыхъ,
10 и҆ ви́дѣша мѣ́сто, и҆дѣ́же стоѧ́ше бг҃ъ ї҆и҃левъ: и҆ под̾ нога́ма є҆гѡ̀ ѩ҆́кѡ дѣ́ло ка́мене сапфі́ра, и҆ ѩ҆́кѡ видѣ́нїе тве́рди небе́сныѧ чистото́ю.
11 И҆ ѿ и҆збра́нныхъ ї҆и҃левыхъ не повреди́сѧ ни є҆ди́нъ: и҆ ѩ҆ви́шасѧ на мѣ́стѣ бж҃їи, и҆ ѩ҆до́ша, и҆ пи́ша.
12 И҆ речѐ гд҇ь къ мѡѷсе́ю: взы́ди ко мнѣ̀ на го́рѹ и҆ ста́ни та́мѡ, и҆ да́мъ тѝ скрижа҄ли ка́мєнныѧ, зако́нъ и҆ за́пѡвѣди, ѩ҆̀же написа́хъ законоположи́ти и҆̀мъ.
13 И҆ воста́въ мѡѷсе́й и҆ ї҆исѹ́съ предстоѧ́вый є҆мѹ̀, взыдо́ша на го́рѹ бж҃їю
14 и҆ ста́рцємъ рѣ́ша: пожди́те въ молча́нїи здѣ̀, до́ндеже возврати́мсѧ къ ва́мъ: и҆ сѐ, а҆арѡ́нъ и҆ ѡ҆́ръ съ ва́ми: а҆́ще комѹ̀ слѹчи́тсѧ сѹ́дъ, да и҆́дѹтъ къ ни҄мъ.
15 И҆ взы́де мѡѷсе́й на го́рѹ, и҆ покры̀ ѡ҆́блакъ го́рѹ,
16 и҆ сни́де сла́ва бж҃їѧ на го́рѹ сїна́йскѹю, и҆ покры̀ ю҆̀ ѡ҆́блакъ ше́сть дні́й. И҆ воззва̀ гд҇ь мѡѷсе́а въ де́нь седмы́й и҆з̾ среды̀ ѡ҆́блака:
17 ѡ҆бли́чїе же сла́вы гд҇ни, ѩ҆́кѡ ѻ҆́гнь пламенѹ́ѧ на версѣ̀ горы̀, пред̾ сы́ны ї҆и҃лєвы.
18 И҆ вни́де мѡѷсе́й въ средѹ̀ ѡ҆́блака и҆ взы́де на го́рѹ, и҆ бѣ̀ та́мѡ на горѣ̀ четы́редесѧть дні́й и҆ четы́редесѧть ноще́й. |
