1 По глаго́лѣхъ же си́хъ, бы́сть сло́во гдⷭне ко а҆вра́мѹ въ видѣ́нїи но́щїю, гл҃ѧ: не бо́йсѧ, а҆вра́ме: а҆́зъ защища́ю тѧ̀, мзда̀ твоѧ̀ мно́га бѹ́детъ ѕѣлѡ̀.
2 Глаго́ла же а҆вра́мъ: влдко гдⷭи, что́ ми да́си; а҆́зъ же ѿпѹща́юсѧ безча́денъ: сы́нъ же масе́къ домоча́дицы моеѧ̀, се́й дама́скъ є҆лїе́зеръ.
3 И҆ речѐ а҆вра́мъ: поне́же мнѣ̀ не да́лъ є҆сѝ сѣ́мене, домоча́децъ же мо́й наслѣ́дникъ мо́й бѹ́детъ.
4 И҆ а҆́бїе гла́съ гдⷭень бы́сть къ немѹ̀, гл҃ющїй: не бѹ́детъ се́й наслѣ́дникъ тво́й, но и҆́же и҆зы́детъ и҆з̾ тебє̀, то́й бѹ́детъ наслѣ́дникъ тебѣ̀.
5 И҆зведе́ же є҆го̀ во́нъ и҆ речѐ є҆мѹ̀: воззрѝ на не́бо и҆ и҆зочтѝ ѕвѣ́зды, а҆́ще возмо́жеши и҆счестѝ ѧ҆̀. И҆ речѐ: та́кѡ бѹ́детъ сѣ́мѧ твоѐ.
God shows Abraham Stars 6 И҆ вѣ́рова а҆вра́мъ бг҃ѹ, и҆ вмѣни́сѧ є҆мѹ̀ въ пра́вдѹ.
7 Рече́ же къ немѹ̀: а҆́зъ (є҆́смь) бг҃ъ и҆зведы́й тѧ̀ ѿ страны̀ халде́йскїѧ, ѩ҆́кѡ да́ти тебѣ̀ зе́млю сїю̀ наслѣ́дствовати.
8 И҆ речѐ: влдко гдⷭи, по чесомѹ̀ ѹ҆разѹмѣ́ю, ѩ҆́кѡ наслѣ́дити ю҆̀ и҆́мамъ;
9 Рече́ же къ немѹ̀: возмѝ мнѣ̀ ю҆́ницѹ трилѣ́тнѹ и҆ ко́зѹ трилѣ́тнѹ и҆ ѻ҆вна̀ трилѣ́тна, и҆ го́рлицѹ и҆ го́лѹбѧ.
10 Взѧ́ же ѻ҆́нъ всѧ҄ сїѧ҄ и҆ раздѣлѝ ѧ҆̀ на по́лы, и҆ положѝ ѧ҆̀ противоли҄чна є҆ди́на ко дрѹго́мѹ: пти́цъ же не раздѣлѝ.
11 Слетѣ́ша же пти҄цы на тѣлеса̀ растє́санаѧ и҆́хъ: и҆ сѣ́де бли́зѹ и҆́хъ а҆вра́мъ.
12 Заходѧ́щѹ же со́лнцѹ, ѹ҆́жасъ нападѐ на а҆вра́ма, и҆ сѐ, стра́хъ те́менъ ве́лїй нападѐ на́нь.
13 И҆ рече́но бы́сть ко а҆вра́мѹ: вѣ́дый ѹ҆вѣ́си, ѩ҆́кѡ пресе́лно бѹ́детъ сѣ́мѧ твоѐ въ землѝ не свое́й, и҆ порабо́тѧтъ ѧ҆̀, и҆ ѡ҆ѕло́бѧтъ ѧ҆̀, и҆ смирѧ́тъ ѧ҆̀ лѣ́тъ четы́риста:
14 ѩ҆зы́кѹ же, є҆мѹ́же порабо́таютъ, сѹждѹ̀ а҆́зъ: по си́хъ же и҆зы́дѹтъ сѣ́мѡ со и҆мѣ́нїемъ мно́гимъ:
15 ты́ же ѿи́деши ко ѻ҆тцє́мъ твои҄мъ въ ми́рѣ, препита́нъ въ ста́рости до́брѣй:
16 въ четве́ртѣмъ же ро́дѣ возвратѧ́тсѧ сѣ́мѡ: не бо̀ и҆спо́лнишасѧ грѣсѝ а҆морре́ѡвъ до нн҃ѣ.
17 Є҆гда́ же бы́сть со́лнце на за́падѣ, пла́мень бы́сть: и҆ сѐ, пе́щь дымѧ́щисѧ, и҆ свѣщы̀ ѻ҆́гнєнны, ѩ҆̀же проидо́ша междѹ̀ растеса҄нїи си́ми.
18 Въ де́нь то́й завѣща̀ гдⷭь а҆вра́мѹ завѣ́тъ, гл҃ѧ: сѣ́мени твоемѹ̀ да́мъ зе́млю сїю̀ ѿ рѣкѝ є҆гѵ́петскїѧ да́же до рѣкѝ вели́кїѧ є҆ѵфра́та:
19 кене́ѡвъ и҆ кенезе́ѡвъ и҆ кедмѡне́ѡвъ,
20 и҆ хетте́ѡвъ и҆ ферезе́ѡвъ и҆ рафаі́нѡвъ,
21 и҆ а҆морре́ѡвъ и҆ ханане́ѡвъ, и҆ є҆ве́ѡвъ и҆ гергесе́ѡвъ и҆ ї҆евѹсе́ѡвъ. |
;)